Ellur

Ári hef ég gaman af Evróvisjónspekingunum norrænu. Og ég var nokkuð sammála áliti þeirra áðan. Held þó, eins og Eiríkur, að óraunhæft sé að ætla honum efsta sætið í undankeppninni. Og sjálfur vil ég gjarnan að lagið frá Georgíu komist áfram. Ég er hins vegar ekki hrifinn af makedónska laginu og Hvítrússinn er einhver mesti sætabrauðsdrengur sem sést hefur síðan Donny Osmond var og hét (Donny er bara betri söngvari). Lagið frá Andorra, skemmtileg McFly- og Busted-stæling, kemst vonandi áfram á ferskleikanum og mikið hafði ég gaman af diskófönkinu frá áttunda áratugnum sem Belgar buðu upp á. Lettar mega aftur á móti sitja heima mín vegna. Slóvenar sömuleiðis. Það voru hins vegar Tyrkir sem gerðu mig aldeilis dolfallinn. Aðra eins hörmung hef ég hvorki séð né heyrt lengi og ég botnaði ekkert í spekingunum sposku að gefa því svona mörg stig! En smekkur og spádómar eru gerólíkar Ellur og Tyrkir komast áreiðanlega áfram. Gangi þér vel í Helsinki, Eiríkur, og takk fyrir skemmtunina í þessum þáttum.

Athugasemdir

[Guðríður Hrefna Haraldsdóttir, 27.4.2007 kl. 22:00]

Vinkona mín féll fyrir ungverska laginu ... önnur vinkona blaðraði við mig í síma þannig að ég heyrði það ekki nógu vel. Hvernig fannst þér það ungverska?

[Helgi Már Barðason, 27.4.2007 kl. 22:06]

Mig minnir að það hafi verið blúslag... bara mjög fínt og vel sungið. Ég varð hins vegar hálfsjóveikur af vídeóinu þar sem allt var sýnt afturábak!