Lög

Í aukakrónuauglýsingu Landsbankans er spilað lagið "I Was Kaiser Bill's Batman" með Whistling Jack Smith, blísturslag sem ég man vel eftir frá því að ég var barn og gleypti í mig alla tónlist sem heyrðist á Rás 1 og var léttari en Mahler og Mussorgsky. Mér þykir illa farið með þetta skemmtilega lag í auglýsingunni. Það er sundurskorið og klippt og síðan er því skeytt saman þannig að úr verður lagleysa og ekki nokkur leið fyrir þá, sem ekki kannast við lagið, að gera sér grein fyrir því hvernig það hljómar í raun og veru.

Það getur vel verið að einhverjum finnist ég vera að agnúast að óþörfu. En mér finnst nauðsynlegt að borin sé ákveðin virðing fyrir tónsmíðum annarra, líka (og kannski ekki síst) dægurlagahöfundum. Þetta er því miður ekki fyrsta lagið sem verður fyrir barðinu á "sniðugum" auglýsingagerðarmönnum, en kannski hafa Landsbankinn og önnur slík örfyrirtæki ekki efni á að biðja einhvern góðan tónsmið að semja stef handa sér...

Athugasemdir

[Inga Dagný Eydal, 3.8.2007 kl. 11:50]

Er svo afskaplega ógurlega sammála þér Helgi, heyrði einmitt þessa vesælu útgáfu blístraða í útvarpinu. Hvar er Stef í svona tilfellum?  Vona annars að þið eigið friðsæla verslunarmannahelgi fyrir norðan. Veistu annars ekki um góða vinnu handa 44 ára gamalli (ungri) konu sem er farið að langa heim?

[Björn Jónsson (IP-tala skráð) 3.8.2007 kl. 17:17]

Algerlega sammála þér Helgi, þetta er eitt af þessum lögum sem maður fékk að heyra í æsku á gömlu Gufunni og eru manni óendanlega kær einhverra hluta vegna, sennilega af því að þau eru svo góð. Auglýsingabransinn er búin að vanvirða mikið af tónlist í gegnum tíðina og ég held að það breytist ekki í bráð, en það er um að gera að láta í sér heyra um það mál.  Annars sakna ég þáttar er við krydd var kendur og var á "Rás eitt", því þar gat maður átt von á að heyra "I was Kaiser Bill´s Batman" og fleiri gullmola æsku minnar, hafðu þökk fyrir.

[Jens Guð, 5.8.2007 kl. 18:22]

  Það er hlutverk STEF að gæta höfundarheiðurs.  Þegar erlent lag er notað í íslenska auglýsingu þarf auglýsandinn að senda fyrirspurn til STEF.  Þar á bæ er síðan kannað hjá þeim sem gætir höfundarréttar viðkomandi lags hvort nota megi lagið. 

  Höfundarréttur nær hinsvegar bara yfir síðustu 50 ár (reyndar örlítið mismunandi eftir löndum).  Sú er ástæðan fyrir því að margir auglýsendur nota nota bara músík sem var hljóðrituð fyrir 1957.    

[Helgi Már Barðason, 5.8.2007 kl. 18:37]

Ef ég man rétt er lagið gefið út 1967, svo að vonandi hefur auglýsandinn haft vaðið fyrir neðan sig hvað höfundarréttinn varðar...