Hrópandi ósamræmi

Framkvæmdastjóri Einnar með öllu hefur víst tilkynnt að ekkert verði úr hátíðarhöldum um verslunarmannahelgi á Akureyri að ári ef útiloka á aldurshópinn 18-23 ára.

Ekki vissi ég að það væri í hans valdi að ákveða slíkt. Hélt í einfeldni minni að öðrum félögum væri frjálst að spreyta sig og að maður þyrfti að fá leyfi hjá bæjaryfirvöldum til hátíðahalda.

Bragi segir í viðtali við Fréttablaðið að hátíðin hafi verið stofnuð til að auka ferðamannastraum til bæjarins.

Eru ferðamenn það sama og ferðamenn? Ég held ekki. Þá "ferðamenn", sem hingað hafa fjölmennt um verslunarmannahelgar á undanförnum árum og sett svip sinn á bæinn, svo ekki sé dýpra í árinni tekið, kæri ég mig ekki um.

Bragi segir líka að það sé í hrópandi ósamræmi að loka þennan hóp úti núna en bjóða hann svo velkominn á heimavistir og stúdentagarða eftir mánuð.

Hvaða ósamræmi er það? Er þetta ekki svipað og að eiga kunningja, sem er velkominn í heimsókn þegar hann er edrú en ekki þegar hann er drukkinn? Þekkja ekki flestir einhvern slíkan mann eða konu?

Það er í hrópandi ósamræmi við þá ímynd Akureyrar, sem ég held að bæjarbúar vilji, að halda "hátíð" á borð við þá sem hér hefur liðist á undanförnum árum. Helgin í ár var ánægjuleg undantekning og ég fagna því ef frekari sukkveislur verða ekki haldnar í framtíðinni, svo að sannir ferðamenn geti gengið um bæinn og notið hans með heimamönnum.

Athugasemdir

[H. Magnússon (IP-tala skráð) 7.8.2007 kl. 10:14]

Ég heyrði viðtal við Braga á Rúv í gær. Þar sagði hann að þeir sem staðið hefðu fyrir hátíðahöldunum Ein með öllu síðustu árin ár myndu ekki gera það oftar, ef þau skilyrði varðandi aldur sem nú voru sett yrðu þannig áfram. Því fer víðs fjarri að hann hafi neitt verið að útiloka að einhverjir aðrir stæðu að hátíðahöldum á Akureyri ...

[Helgi Már Barðason, 7.8.2007 kl. 10:29]

Bestu þakkir fyrir þessa athugasemd. Heyrði ekki RÚV-viðtalið en það meikar a.m.k. meira sens en hitt...

[Benedikt Sigurðarson, 7.8.2007 kl. 18:19]

Tek undir með þér Helgi að við viljum ekki bjóða upp á hvað sem er - og alls ekki samþykkja það framvegis að einhver sjálfskipaður taki að sér að "selja inn" á þitt tún og jafnvel lóð og bílastæði - án þess að spyrja hvort þú viljir vera með í geiminu.

Hér var samt sem áður ekki nógu vel að staðið - fyrst búið var að samþykkja eitthvert samstarf og stuðning af hálfu bæjaryfirvalda  - og leggja tjaldsvæðin á Hömrum undir.

Fráleitt fannst mér líka að heyra að tjaldgestum var gert að greiða fyrir 3 nætur  - en ætluðu bara að vera eina nótt;  - og eins og  veðrið var á föstudagskvöldið.  (Sigga og Geiri borguðu fyrir fellihýsið sitt í 3 nætur frekar en að hrekjast á vergang  og ákváðu að vera líka aðra nótt - úr því þau voru búin að borga).  Gott fyrir bissnissinn . .. ... .. ?

Held að við þurfum nú að ná umræðunni niður af þrætuplaninu - og leggja upp framtíðarsýn - fyrir eitt risastórt ættarmót stórfjölskyldunnar á Akureyri - með þátttöku íbúanna og burtfluttra  - og bjóðum vinum og vandamönnum að koma og vera með okkur.  Eitt rokna geym - í góðu yfirlæti (e án yfirgangs).

 Öll dýrin í skóginum.. ... .. . .geta verið vinir

[Helgi Már Barðason, 7.8.2007 kl. 18:56]

Ekki vissi ég um þetta peningaplokk á tjaldstæðunum. Ljótt að heyra, og ég er sammála þér, Bensi, um að svona nokkuð gengur ekki.

Ég er líka sammála um framtíðarsýnina, en mér finnst einhvern veginn eins og ég hafi heyrt eitthvað þessu líkt í kringum kosningar og í sambandi við málefnasamning meirihlutaflokkanna. Ég held að það verði að fara aðra leið en að gefa fulltrúum þeirra sem taka skyndigróða fram yfir allt annað lausan tauminn. Þeir mega ekki setja reglurnar. Þess vegna fagnaði ég ákvörðun bæjarstjóra, í þessu tilfelli fannst mér umdeild leið skárri en engin.

Málið leysist áreiðanlega ekki fyrr en ráðist er að rót vandans. Kannski þarf fjöldahreyfingu meðal unga fólksins sjálfs, þ.e. hins stóra, þögla meirihluta sem er til fyrirmyndar í alla staði, þar sem það gerir minnihlutahópnum fyrirferðarmikla ljóst að framkoma hans verði ekki liðin lengur? Ég held að aldurstakmörk víða um land og aðrar ráðstafanir hljóti að verða til þess að það renni upp fyrir ungmennum á tvítugs- og þrítugsaldri hvað þessi hópur hefur eyðilagt mikið fyrir þeim.

Og til þess að dýrin í skóginum geti verið vinir þurfa þau fyrst að gera sér grein fyrir að þau búa í skógi - öll saman. En fyrst við höfum enn ekki gert okkur það ljóst hvað umferðina snertir, þar sem þrjúhundruðþúsund Pallar eru ennþá einir í heiminum, er kannski hæpið að ætlast til slíks á mannamótum...