Pabbar og prinsessur

Í gær fór ég á tveggja tíma námskeið (og tæplega það) sem hét "Pabbar og prinsessur" og þar átti að kenna okkur feðrunum að flétta hár dætra okkar og greiða það með ýmsum hætti. Ég hlakkaði til að fara, enda hef ég lengi ætlað mér að læra eitthvað í þessa veru og löngum horft öfundaraugum á þá feður sem greiða dætrum sínum eins og það sé einfaldasta verk í heimi.

En námskeiðið olli mér talsverðum vonbrigðum, því miður. Þarna var ein kona að leiðbeina okkur körlunum (ætli við höfum ekki verið 10 talsins) og fyrir menn eins og mig, sem eru ríkulega útbúnir af þumalfingrum, er það alltof lítið. Ég hélt að þarna yrðu fleiri leiðbeinendur og hefði í rauninni aldrei farið á námskeiðið ef ég hefði vitað að leiðbeinandinn yrði aðeins einn, hvað þá borgað 3500 krónur fyrir.

Mér fannst námskeiðið því miður alls ekki peninganna virði. Vitaskuld lærði ég örlítið um fléttugerð og greiðslu en það var óttalegt smáræði og konan gat ekki með nokkru móti sinnt okkur öllum eins og skyldi. Ég er því litlu betur staddur í hárgreiðslunni en ég var áður. Og dóttir mín er ekki síður vonsvikin en ég, enda eyddum við talsverðum tíma í bið og ekki neitt.

Áður en næsta námskeið er skipulagt verður hágreiðslustofan að sjá til þess að leiðbeinendur séu fleiri eða þátttakendur færri. Það verður að mínum dómi að vanda betur til verks næst, ef meiningin er að endurtaka leikinn og eru feður hér með varaðir við að láta glepjast af gylliboðum af þessu tagi.

Athugasemdir

[Eyjólfur Sturlaugsson, 23.9.2007 kl. 18:00]

Sæll  Helgi

Leitt að heyra hvernig fór.  Hugmyndin að námskeiðinu er hinsvegar frábær. Stundum eru það prinsessurnar sem að lokum kenna pöbbunum :)

kv.

Lói

[Inga Dagný Eydal, 25.9.2007 kl. 16:00]

Þú færð mörg prik frá mér fyrir áhugann og framtakið. Synd að það skyldi ekki vera betur að þessu staðið. Þú verður líklega bara þess duglegri að æfa þig