Na na na

Eitt allra vinsælasta - nei, allra vinsælasta lagið í sögu æskulýðsheimilisins (síðar félagsmiðstöðvarinnar) Dynheima á Akureyri á árunum 1974-1984 (og kannski lengur) var Na Na Na með trommuleikaranum Cozy Powell. Cozy þessi hét réttu nafni Colin Flooks, fæddist á Englandi árið 1947 og er af mörgum talinn einn allra færasti trommuleikari sinnar samtíðar. Hann er trúlega þekktastur fyrir spilamennsku sína í hljómsveit Ritchies Blackmore, Rainbow. Cozy Powell lést í bílslysi árið 1998.

Ekki er mér kunnugt um að Na Na Na hafi náð viðlíka vinsældum annars staðar í heiminum. Þetta var hálfgert einkennislag Dynheima í a.m.k. áratug ekkert lag var spilað jafnoft, ekki einu sinni útgáfa Showaddywaddy af Under The Moon of Love, sem þó var svo sannarlega vinsæl. Dance With The Devil er áreiðanlega þekktasta lagið sem Cozy sendi frá sér á sólóferlinum, en varð aldrei jafn vinsælt í Dynheimum og einfalda lagið með einfalda nafninu: Na Na Na.

Í kvöld verður opnuð ný félagsmiðstöð fyrir unglinga í gamla Barnaskóla Akureyrar, fallegu húsi sem setur mikinn svip á bæinn. Ég hitti forstöðumanninn áðan, sem er gamall Dynheimaunglingur, og þá rifjaðist svo margt upp fyrir mér sem ég hafði ekki hugsað um lengi. Til dæmis Cozy Powell og Na Na Na. Þá uppgötvaði ég að ég hafði aldrei haft hugmynd um hver söng lagið, en vissi að Cozy hafði ekki gert það sjálfur. Nú veit ég að það var gamall félagi hans, Frank Aiello. Höfundur lags og texta er John Cameron.

Meira um Cozy og Dynheima síðar (það er ég viss um).

Athugasemdir

[Inga Dagný Eydal, 25.9.2007 kl. 19:05]

Vááá ég bara varð að kommentera á þetta! Þessir dásamlegu tímar þegar Dynheimar voru og hétu. Ég hef komið á margan skemmtistaðinn síðan en þori að fullyrða að hvergi var jafn gaman og í Dynheimum þegar Na Na Na Na var hvað vinsælast.

[Huld S. Ringsted, 25.9.2007 kl. 19:08]

Man maður eftir þessu lagi og ég tala nú ekki um Dynheima!!

[Helgi Már Barðason, 25.9.2007 kl. 22:15]

Afrekaði loksins að setja tónlistarspilara á síðuna hjá mér og þar var Na Na Na sjálfgefinn fyrsti kostur... á ábyggilega eftir að setja hér inn fleiri góða kunningja frá sokkabandsárum okkar, stelpur

[arnar valgeirsson, 25.9.2007 kl. 22:27]

meira um dynheima síðar já, væri snilld. man eftir þegar maður dansaði í 16 og hálfan tíma, samfleytt. og ekki síður þegar maður tók tuttuguogfimm tímana, íslandsmet sko.. en það voru fjórir svo ég varð ekki opinber íslandsmeistari! en litli bróðir sló það nú síðar, en þá voru breyttar reglur. pásur og svoleiðis stöff.

svo voru það auðvitað 1/2 7 og baraflokkurinn.... og gary numan.

[Kristín M. Jóhannsdóttir, 25.9.2007 kl. 22:40]

Dynheimar já. Ég var nú alltaf svolítið utanveltu þar. Kunni betur við mig í Hlíðarfjalli.

[Björn Jónsson (IP-tala skráð) 27.9.2007 kl. 00:55]

Blessaður Helgi ! þar sem ég hef sérstakt dálæti á trommurum finnst mér magnað að sjá fjallað um einn að mínum uppáhalds hérna, Cozy heitinn Powell sem eins og þú segir var einn af færari trommurum sinnar samtíðar já og breskrar rokksögu, trommari með sinn stíl. Gaman að fá að heyra þetta lag sem ég hef ekki oft heyrt, finnst það mun skemmtilegra en hitt lagið sem nefnt er.

[Stefán Þór Sæmundsson, 30.9.2007 kl. 18:36]

Gaman að geta þess að umrædd listatónsmíð lifir enn því ég man ekki betur en að Ódi (Jón Óðinn Óðinsson) hafi löngum verið með lagið í spinning-tímum sínum í Vaxtarræktinni.