Oft er það gott...

Á fyrri hluta áttunda áratugarins, þegar útvarpsstöðin var auðvitað bara ein, var á dagskránni þáttur sem hét Tíu á toppnum. Umsjónarmaðurinn hét Örn Petersen og þátturinn var vinsældalisti síns tíma. Ég er ekki í nokkrum vafa um að þátturinn naut gríðarmikillar hlustunar. Að minnsta kosti sat ég límdur við útvarpstækið þegar hann var sendur út og það gerðu allir mínir vinir og kunningjar líka.

Um það leyti sem þátturinn góði (og alltof skammlífi) rann sitt skeið á enda voru á toppnum tveir sómamenn, þeir Albert Hammond og Lobo. Albert er tvítyngdur, jafnvígur á spænsku og ensku, og hefur lengi notið vinsælda í hinum spænskumælandi heimi. Hann var hins vegar ekki stjarna nema skamma hríð og langþekktastur fyrir lag sitt "It Never Rains in Southern California". Albert er enn að, fékk orðu frá Bretadrottningu fyrir nokkrum árum fyrir störf sín að tónlistarmálum, og sendi nýlega frá sér plötu eftir langt hlé. Sonur hans og nafni er þekktur gítarleikari (Strokes).

Lobo heitir Kent Lavoie réttu nafni, er af indíánaættum og varð líka skammlífur á stjörnuhimninum. Kunnasta lag hans heitir "I'd Love You To Want Me". Árið 1975, þegar Tíu á toppnum kvaddi (ef minnið svíkur mig ekki), var skin þeirra Alberts og Lobos á stjörnuhimninum mjög tekið að dofna. Ég hef, að gamni, sett hér inn á spilarann lögin sem voru númer 1 og 2 daginn sem Örn Petersen tilkynnti að þættirnir Tíu á toppnum yrðu ekki fleiri. Ég get þó ekki fyrir mitt litla líf munað hvort lagið var í fyrsta sæti. Það gerir heldur ekkert til. Þetta eru létt lög og melódísk - kannski örlítið væmin, en gerir það nokkuð til?

Athugasemdir

[Björn Jónsson (IP-tala skráð) 27.9.2007 kl. 21:09]

Var búinn að gleyma þessu lagi með Lobo, en mig rámar í lag sem heitir "Me and you and a dog named Boo". Man hinsvegar eftir Tíu á toppnum þar sem maður var ávallt tilbúinn á rec takkanum á kassettutækinu sem mér áskotnaðist í fermingargjöf.